《呢半個鐘，係留返俾冇儲錢既９０後既》
近日網上流傳一個故事，大約係講有個９０後約左一間公司１０點鐘去見工，點知去到ＨＲ話老細開緊會要等等，個９０後等到半個鐘終於忍唔住起身走，仲話：「公司都有expectation, 唔希望員工遲到, 我對公司都有expectation, 約左10點in, 宜家都10點半了. 如果你地約好個客10點, 你會唔會遲到半小時？ 」ＨＲ亦回敬一句：「你喜歡啦,宜家是你來求工作, 等老細是常識吧？」
網上反應好差參半，年青人大多支持９０後，覺得我唔係黎乞份工，你同樣需要我。年紀大的都有部分認為出黎做野係咁，老細始終係老細，９０後唔應該意氣用事。窮生就唔大唔細喇，我就咁睇，出黎打工所有野都係講回報，我唔知果位９０後係唔係真係意氣用事。但呢Ｄ咁「有型」既態度，事前係要做Ｄ準備既，就係你有冇能力慢慢揀工黎返。
窮生早幾年可以有幸同好多唔同既90後青年分享自己對理財既睇法，因為大部分在場學生都係返下Part Time，就算出左黎做野果Ｄ都係頭１年。所以我既主題都係集中係儲錢，我經常有句格言就係「愈低人工愈要儲得多」。我次次講親大部分９０後都對呢種想法嗤之以鼻。覺得自己可能都係搵得10K左右，左扣右扣果Ｄ錢都唔會得返幾多，不如等做多幾年手頭鬆Ｄ先儲會有效好多。如果大家都係咁諗，就真係唔明白儲錢既真諦喇！
大部分後生仔係未打算成家立室之前，接觸儲錢多數係因為有Ｄ野想買/有旅行想去。係有個目的地做一個由１個月到１年左右既儲錢計劃。但係出得黎社會做野，要面對既就唔係買一樣野咁簡單，而係計劃人生。唔洗Hi我講埋D老屎忽野住，我係想講，你愈儲到錢，你就愈可以「有型」。都係果句，有DADDY人士你走啦，我唔想搞大件事，我既野唔係俾你地睇既。
窮好多時係一個惡性循環，現實未必可以人人入３大神科出黎幾萬蚊一個月。大部分人出黎都係萬零蚊。之後又ＯＴ，又多錢要用要交卡數又未找咁樣，有好多９０後做幾年後可能會改口：「老細始終係老細，００／１０後唔應該意氣用事！」點解？因為你睇唔起一開頭果萬零蚊！我以一開頭１２Ｋ計，如果第一年可以儲到６—７萬同１蚊都冇，你思考既高度係唔同既。
正如我之前所講，出黎打工所有野都係講回報，係唔係黎乞工作，只有你自己先知。你有錢係身，可以慢慢揀既能力就高Ｄ，大家有冇Ｄ朋友係好難轉工，做親都係Ｄ西工，返工俾人蝦又唔敢出聲？你估佢ＥＱ好高呀？因為佢下個月洗費都要煩惱，佢冇能力慢慢等一份可以令佢爬得更高既工作，久而久之佢既上升階梯都唔會理想，１０年後佢既人工就會比其他人低，呢１０年累積既損失就真係見到都喊出黎。
一個人（尤其男人）係３０歲左右開始係事業衝刺期，姐係話你３０歲前係鋪緊條跑道，好彩既係呢條道條冇「三跑」咁貴，資金就來自你每月可以萬幾兩萬既人工。所以窮生哲學就係，儲錢唔係老土野，唔係防饑咁簡單！儲錢係令你可以做起身轉身走果個90後，同個ＨＲ講我對公司都有expectation。你值得有更好的待遇，呢半個鐘係留俾Ｄ下個月唔知點算既人等，佢將會跌入唔儲錢既惡性循環。
Search